Nato a Schio, il 26-10-43,
ivi residente, entra a far parte de "La Panocia" nel
1978. Pubblica nel 1989 'Dialeto e italìan, tegnendose
par man', scritto in collaborazione con Ada Agostini. Sue poesie si trovano nelle raccolte antologiche "La
Panocia, El Tamiso, La Panocia 1994".
Sie giugno otantadó
In zenocio te prego, Signore
de scoltare ancó sta preghiera
par sta dona, sta mama che móre
fursi prima che cale la sera.
Lo sò ben che a Ti pi mi no parlo
de sicuro da almanco dies'ani;
ma sto fiolo te ghè da scoltarlo
par leviàrghe a so mama i afani.
Mi ghe credo che ti, o Signore,
da lassú, da insima el to trono,
a sto fiol no te porti rancore
se, col cor, te domanda pardono.
Ze par questo che alora te digo
de scoltare ancó sta preghiera:
faghe posto, là su in Paradiso,
a me mama che riva stasera.
Mi go fato un gran sbàtar de oci,
grande roda del vecio mulin,
l'orolojo sonava du boti
co te go ben vardà da vissin;
po' vardando le stéle nel celo,
par no farse da altri sentir
me ga dito "Gianilo" pianèlo,
d'ispirarme e de scrivar de ti.
Mi però che no son gran poeta
za me sento 'l sarvelo nebià
par sercare la rima parfeta
su 'sta roda che torno la va.
"Ben la màsena sorgo e formento"
i ga scrito su piera quadrata
"fin dai primi del mileotosento"
va con l'aqua de rósa "Verlata".
Ma 'sto atresso ga solo un difeto,
se difeto podemo ciamar,
ogni tanto ghe vole l'ometo
che la vegna 'n pocheto a guernar.
Con afeto 'l ghe smonta un guciaro
po' dopo 'l ghe lima un tocheto
ghe vol aqua filtrà, dal cor ciaro,
se no pian ciò 'sta roda va in leto.
Ma la zente che tante gh'in fa
no la ga ben gnancora capîo
che 'sta rósa la va rispetà
che no ze na gran fogna, par dio!
Pora rósa ingolfà dal paltan
e da borse strapiene de sqúasse
par davero 'l sarìa un malan
se 'sta roda un bel dì se fermasse.
E da quanto mi posso capire
el sarìa un scherso un fià amaro
tocarìa de fame morire
se farina no fa pi 'l munaro
Vojo dirve: stasemo ben tenti
co passemo su strade co fossi
ben serchemo de èssar prudenti
no butemo 'nte l'aqua scartossi!
