Nata a Schio l'11 dicembre 1924, ivi residente, entra a far parte dell'associazione dalla sua fondazione. Ha edito il libro 'Barufe a scola'. Antologie contenenti sue poesie: El bosco, El me ritrato, Grani de sorgo, La poesia del giorno, La Panocia, El tamiso, La panocia 1994.

Poesie premiate o segnalate: 20.

Brusamarso

Lingue de fogo
intorcolà fà serpi in amore
zuga a ciapare na stela.
Un girotondo de fantasmi
co màscare rosse
de un carnavale mai finìo.
Canti e alegria
missià a s-ciochi e lamenti
de rami sechi che arde.
Drio el mucio de sènare
doman spuntarà fiori
de speranse sognà
che ne jutarà a rivare
a 'n altro Brusamarso.

Soljanin Izet Icio 'lume a petrolio'

Quatro vache magre che rúmega:
odor de luame, de fien, de foje secà.
Intorno ala tola
nera, incarolà,
se fa la partia;
le done desgrana panoce,
tacona sbreghi e tassei,
slunga cotole e braghe ...
un par de sberloti
a chi tenpela i putei.
El barba, come tute le sere,
conta storie de guere,
de salbanei, de zente strià.
Chi vole, se tole dal sesto de paja
rajoti de ua benedia
o rósega pumi e nosele,
burielo del di dela stria.
La nona scapina su un scagno:
un fero ghe casca,
i oci se sara;
i punti ghe scapa.
In gaia a so mama
el bocia pi picolo finfola:
ze ora de farla finia.
La vecia fogara che speta
ga fursi le bronse smorsà:
un segno de crose de pressa,
un "rechie eterna ..." pai morti
un "ave maria" par la note.
Fa strada el canfin dentro tel scuro:
le onbre sparisse ... se sfanta ...
insieme a tanti me sogni e bele ilusion
che me conpagnava in quei ani
co 'ndavo anca mi a fare filò.