(14 dicembre 1934 - 8 gennaio 1995)

Enrica entra a far parte de 'La Panocia' nel 1977. Sue poesie si trovano nelle antologie edite dal gruppo:'El me ritrato, Grani de sorgo, La Panocia, El Tamiso, La Panocia 1994'. Ha ottenuto, ai vari concorsi di poesia cui ha partecipato, 31 fra segnalazioni e premi.

Coi oci mie

No te conosso
e no te me conossi.
Epur so ben
che ti no te ghe vidi,
ma mi so za
che un dì te vedarè.
Quel giorno
sarò mi che no ghe vedo
e ti te ridarè
e te pianzarè
de gioia e de dolore
coi oci mie
che un dì te lassarò.
No vojo gnente, mi
no vojo gnente,
ma un desiderio fursi gavarìa:
poder vardare
coi oci tui
che un giorno ze sta mie
el viso de me fiui
solo na volta.

Ale

UCCELLI (ferro battuto) Mario Converio

Vuria
sol par na volta sola
poderme métar l'ale.
Ciapare par na man
el vento piú ramengo
e andar co lu lesiera
zolando verso el celo.
La stela piú slusente
la robaria a la note
e me la puntaria
felisse tra i caviji.
Vuria poderme dondolare
un poco su la luna
zugare ciapascóndare
con nuvole lesiere
e po, sul pra del celo,
ciapare a calci el sole.
Vuria
sol par na volta sola
poder robar na stela.
Vuria... vuria... vuria
sol par na volta sola
che me spuntasse l'ale.