Rodolfo Rosponi
(nato il 14-12-1901 deceduto il 24-10-1990)
Nato a Torrebelvicino fu uno dei
soci fondatori de 'La Panocia'. Sue poesie si trovano
nelle antologie dialettali 'El Bosco, La Poesia del Giorno,
El me Ritrato, Grani de Sorgo, La Panocia 1994'.
El bosco
El bosco, digo mi,
ze el vero gran saloto dea natura.
Entrar nel bosco
te par de respirar na nova vita,
te par de caminare te un tapedo
che solo man Divina ga tessudo
e tanta pace te va drento el core
che mai e mai no te te senti solo.
Le piante stesse te deventa amiche
e l'aria profumà
da biancospini e ciclamini
la invita la to anima a sognare
e par conpagnamento al sogno tuo
un armonioso canto de useliti.
Mi penso proprio al bosco
come la vera fonte de la vita,
anca parché 'l terestre paradiso
el gera un bosco,
e propio là ze sta che dona Eva
soto el pomaro,
disemoghe salbego,
la ga mandà in te l'estasi el so Adamo
fasendoghe magnar quel dolse fruto
che, «porca Eva», semo stà fregà.
