Nato a Schio il 26 agosto 1928 e ivi residente, è uno dei soci fondatori de "La Panocia". Sue poesie si trovano nelle antologie: Versi nostrani, El bosco, La poesia del giorno, El me ritrato, Grani de sorgo, La Panocia, El Tamiso e La Panocia 1994.

La pergola

- El solfro bison darlo co fa suto
ale visele, presto, la matina.
Vero ? - Giusto! - Intanto la Santina
la porta el meso litro. - E sora tuto
star tenti che le foie no se 'male!
Silvio, Piero ze d'accordo. Dal resto
parla così el sior Chichi Modesto,
drito, sincero, che no conta bale.
- E mi son drio taiar col motosega, -
taca a dire el Lino Cortelaro,
- un toco del me bosco su al Festaro,
roba fina che no fa na piega! -
Mi taso e scolto, sentà li da rente,
sti discursi sinceri e senplissioti
che, conpagnà dal tintinar dei goti,
te dise tuto quanto de sta zente.
Bevo anca mi un bicere in conpagnia
e anca mi a taco a ciacolare
co lori. Ve posso asicurare
che la ze brava zente, in fede mia!
Che tase e scolta adesso ghe ze solo
la pergola de ua mericana.
L'onbra ze bela. L'aria fresca e sana.
I rondenoti tenta el primo zolo.

Giuliano Dal Pozzolo

Ze tanti i posti chieti, qua vissin
a sta sità de trafego e bordelo,
ma 'l pi carateristico el pi belo,
l'é quelo là un fià alto: San Martin.

Se passa par stradele, fra le case
con tanti tanti fiori sui balcuni;
là in cielo gh'è na giostra de ronduni;
su na nogara un finco mai no tase.

E quando la stradela se fa streta,
svoltando fra na siesa e na masiera,
eco che pian pianin, in sta maniera,
te rivi proprio soto ala ceseta.

Una ceseta bela e tanto antica,
che ispira devossion e santità,
dove che na orassion la te farà
passare le amaresse de la vita.

El canpanile, che ghe stà da rente,
ghe fa da rispetosa sentinela
sonando co ocor la canpanela
che la matina fa sveiar la zente.

Ghetu voia de movarte un fiatin?
Ghetu voia de stare un poco chieto?
Fa come fasso mi che, pian pianeto,
fasso do passi e vado a San Martin.