Nato a Marano il 25 dicembre 1914 risedette a Schio fino alla morte (28 giugno 1996).
Fu uno dei soci fondatori de "La Panocia". Ha edito in proprio: Stagioni (versi in grigioverde) - 1942, Par no pianzare - 1981, Il diario della mia prigionia in Algeria, Spolentaure - 1991.
Sue poesie si trovano nelle antologie: 'El bosco, La Poesia del Giorno, El me ritrato, Grani de sorgo, La Panocia, El Tamiso, La Panocia 1994'.
Poesie segnalate o premiate: 54.

Nebia

Mare de fumo, che someja late,
dove fantasmi grisi se strassina
sensa pressa
longo na strada morta,
co i pie che pare fodarà de pessa. Onbre che passa, sensa far bordelo,
e che sparisse
de drio un sipario bianco,
cussì fisso,
che no se taja gnanca col cortelo.
Le lanpadine de la me contrà
ze morte quasi tute,
sofegà
da sta velada bianca.
Dove ze 'ndà quel vaso de gerani,
che gera lì
de fronte a casa mia?
Le piante le par onbre in agonia
che alsa i rami al celo,
come brassi,
par domandar pietà.
El lungo canpanile ze spario,
e de la grande cesa, lì da rente,
se vede solo l'onbra de na porta.
El resto, tuto 'l resto,
se indovina.
Cossa ghe ze de là de sta coltrina
che no ne lassa védare e sentire,
che no ne fa passare?
Un canpo, na stradela o na sità?
Cossa ghe ze de là
de sto murasso bianco sensa porte;
calcossa che scomissia o che finisse?
Ghe ze la vita o pur ghe ze la morte?
Na nuvola de fumo
o pur l'eternità?